هو انتى ليه بعيدة كده ؟

مصر ليست وطن نعيش فيه .. بل وطن يعيش فينا ~ البابا شنودة

مصر ليست وطن نعيش فيه ..

بل وطن يعيش فينا .. يستوطن أحشائنا و يمتلك قلوبنا ونزفره و نستنشقه فى كل نفس يخرج من رئتينا ..

وطن يعيش فينا يسكن الكلمات و الروائح و الملذات ..

ما منعه من الخروج من داخل كل تفصيلة من تفاصيل حياتنا إلا لتعكير صفوها بـ "بواخة" حيثياته .. 

وطن يستخدم التعذيب الحلو لكى يتمكن من السيطرة علينا .. 

"هو انتى ليه بعيدة كده .. ومستحيلة بالشكل ده"

لو حيران ماللى بيحصل و مش قادر تفهم مين مع مين او مين بيعمل ايه ؟ .. الإجابة فى كلمتين "مصر بتدلع عليك" ..

مصر خيرها عليك ومربياك ومعلماك احسن تعليم ووقفت فى ضهرك لحد مابقيت اجدعها شاب وصوتك مسموع وماسابتاكش غير و انت شغال الشغلة اللى تليق بيك و بشهادتك .. ومرتبك فيها مافيش حد فى العالم عنده زيه ..

"فرحة حياتى ومرها .. أيامي ليكي عشتها"

فاكر يوم ماتش الجزائر فى ام درمان كنت عامل ازاى ؟.. مصر جابتلك حقك ؟ .. وبرغم ده يوم لما كسبت الجزائر 4 استكترت على مصر فرحتك ؟ ... فاكر لما مصر كانت بتعذبك و انت برده مش راضي تكرها .. ولما جاتلك الفرصة نزلت عشان تحرر قيودها .. وماستكترش عليها الحرية .. 

"إنت الحقيقة فى دنيا زيف .. وانتى اللى دبت في حبها"

فاكر لما مصر سابتك تغرق فى عرض البحر عشان كنت مخنوق من ظلمها ليك .. طيب فاكر لما ربنا نجاك وقدرت تجيب حق الهجرة وهاجرت براها .. فاكر شعورك بعد اول شهر هناك ايه .. فاكر انت كنت مشتاق لمصر قد ايه .. برغم انك هربان من ظلمها و جبروتها و شوارعها و قرفها .. وبرغم كل اللى حواليك من جمال و خلق بتحترم البشر .. بس برده كنت هتموت و ترجع ..

"بقدر على الناس كلها .. وببقى قدامك ضعيف .. وبتعندى .. و أنا أدوب ندا "

انت عارف لما بيكونوا عايزينك تعمل حاجة لمصلحتهم .. بيعنفوك ويزودوا فيك الوطنية و الإنتماء و بيتفاخروا بيك .. وبيشهدوا الناس كلها إنك أنقى كائن ع الأرض .. لإن البركة فى الشباب .. وإنت تتعنف و تثور عشان تحمى مصر و تحارب عشانها .. تحارب الناس اللى عايزين يأذوها .. , ولما يكونوا هما الناس اللى عايزين يإذوها .. بيستهزأوا بيك لإنك تافه قصاد عظمتهم

"قلبي على كفي إفتحيه .. هتلاقى صورتك ساكنة فيه "

فاكر يوم لما نزلت التحرير .. فاكر انت كنت فرحان ازاى .. كل لما نزهق حس بالاحساس ده .. خلى الاحساس ده نموذج لمصر جواك .. فاكر لما خليت الراجل يرسملك على وشك كله علم مصر بالالوان عشان لما تتصور وتعلق الصورة في قوضتك لما تروح 

ماتشوفش حاجة غير علم مصر بيحتويك ..

"وانا في قلبي مرار .. مابشوفش غيرك ليل نهار"

متخيل نفسك يوم لما مدرعات الشرطة داهمت الميدان في اول يومين .. وهما بيقتلوك وانت بتقول فداكي يا مصر .. ياااه .. شايف انت كان بالنسبة لك دمك كان هين ازاى بس عشان مصر ,, عارف مصر جازتك وكافئتك ازاى .. مصر كمان كان بالنسلها دمك هين ..

"يابعيدة وانت قريبة .. يا محيرة كل القلوب"

ماتنامش غير ومصر راضية عنك .. كله الا رضا الام .. صالح مصر وصارحها باللى بيدور فى عقلك واللى قلبك حاسس بيه .. قولها قد ايه انت بتحبها هتحس في كيلامك معاها بكل الحنان اللى في الدنيا .. و انت بتحكيلها ماتنساش تحذرها من اللى بينهشوا لحمها .. بس اوعاك تزعل منها لما تديك على دماغك عشان ماتغلطش في الاكبر منك ..

"بكتب غرامك عالدروب .. وارسم ملامحك عالمدى"

اعمل كشكول فاضى .. يكون بتاعك لوحدك ماحدش يفتحه غيرك .. و قعد اكتب مصر كتير كررها .. كررها .. كررها ..

ارسم النسر و هو باصص للشمال .. خليه دايما شمال اوع تعدل دماغه عشان يشوف اهل اليمين ... او عى تعدل دماغه ماتحاولش تخليه يشوفك .. لو شافك هما هيدبحوك ..

"ارسم امل يبقى سراب .. واحلم بفرحة القاه عذاب"

اليأس خيانة .. لو انت سكت يبقى هما كسبوا .. فكر نفسك كل شويط باحلامك .. حددها وحطها قدامك .. من وقت للتانى ابقى اخرج بره صمتك عشان ماتنساش الكلام .. اوعاك تنسى الاعتراض .. اعرف انهم زيك ... لا , انت احسن منهم .. انت ما قتلتش ماظلمتش .. مادخلتش حد السجن ظلم ,, انت انقى حد فيهم .. مش هما خرجوا براءة .. لازم تكون انت عقابهم .. عاقبهم بيك .. اكبر عقاب تقدر تجازيهم بيه .. انك تبقى قوى .. اقوى من اى وقت فات .. تبقى عارف امتى تنزل وتخلى صوتك يزلزل الميدان .. خوفهم .

عرف مصر إنك أحسن منهم .. انت اللى هتجيب حقك وحق اللى ماتوا قبلك 

مصطفى .. 2/12/2014

https://soundcloud.com/vito123/fm4hsgar0ntm