ملاذ

ملاذ .. ده مشروع بحلم بيه من وانا عندي ١٣ سنة. فكرت فيه من وقتها ولحد انهارده عمال احلمه وعمال اخططله وازود فيه تفاصيل اكتر..

ملاذ هي مؤسسة غرضها الظاهري للقضاء على ظاهرة قاطني الشوارع من أطفال تخلى عنهم أهلهم لأي سبب، مشردين، متسولين، أو أي شخص مالوش ملاذ أو مأوى، لكن غرضها الاساسي وتعريفها اللي كان في دماغي اول ما الفكرة دي خطرت في بالي هي مؤسسة تأهيل إنساني.(يتبع)  (انا معنديش اي مشاكل في نشر حلمي ده لإن اتمنى انه يتنفذ حتى لو مش انا اللي منفذه بس هفضل اسعى لحد ما انفذه زي مانا مخططله في يوم مالايام).

• فالمرحلة الأولى من ملاذ: مأوى ملحق بيها وحدة رعاية صحية.. ورش تدريب مهني.. مدرسة محو امية.. حضانات وفصول للأطفال- مسجد صغير ملحق بالمأوى.

ملاذ هيتكون بشكل مبدأي على نزل متعدد الغرف في كل غرفة اكتر من سرير زيها زي اي دار إيواء.. يكون هدفها إيواء المشردين وتوفير سبل الرعاية الصحية والمعيشية لهم في نفس الوقت يكون فيه  رعاية تعليمية وتربوية للناس دي إذا كانوا أطفال شباب ناسء او شيوخ حتى.. يكون فيه مدارس محو أمية للأميين منهم.. يكون فيه حضانات ومدارس لمن هم دون السن مع توفير الوسائل الترفيهية والتعليمية لهم زيهم زي عيالنا لما بيروحوا النادي يلعبوا رياضات مختلفة او لما بيروحوا المكاتب العامة يعملوا انشطة مختلفة برده.. كل ده يكون متوفر، بحيث ان ملاذ يعمل بشكل اساسي على تطوير الانسان مش مجرد دار إيواء الناس تسكن فيه.. الأطفال يتعلموا لحد ما يدخلوا المعهد او الكلية اللي يختاروها.. والشباب او الرجال او النساء يتم تنميتهم من ناحية التدريب المهني والحرفي..(نجارة سباكة زراعة الخ)..

 ملاذ مش الهدف منها ان اللي يبدأ منها يموت فيها.. لا الغرض من ملاذ هو تأهيل الناس دي انهم يخرجوا للمجتمع ويقدروا يتعاملوا معاه كأشخاص ذوي كرامة، عارفين واجبهم وعارفين حقوقهم.. الغرض من ملاذ هو إستخلاص العادات والطباع السيئة اللي اكتسبها الناس دي من الشارع لخلق حميد وحسن عالاقل يكونوا قادرين من خلاله تمييز الصح مالخطأ..

• المرحلة التانية: تطوير الوسائل الترفيهية والتعليمية للأطفال من ملاعب و حمام سباحة لتعليم الأطفال بمدربين او مدرسين تربية رياضية(شباب).

• المرحلة التالتة: بناء دار الضيافة.
      بعد كام سنة من المأوى بملحقاتها التعليمية كلها.. عايز يكون في نفس المكان فيه دار ضيافة مجانية لعابري السبيل نوفرلهم بيات ليلة لو تقطعت بهم السبل ومفيش مكان يباتوا فيه الليلة دي.. تكون غرفة مكونة من اكتر من سرير ولكل سرير فيه دولاب بحجم شنطة سفر بمفتاح يكون مع النزيل عشان الخصوصية ونعامل الناس كبني ادمين يعني.. (انا عارف اني بأڤور بس ان شاء الله هحقق الكلام ده)

• المرحلة الرابعة: بناء مسجد مستقل عن ملحقات المأوى. 

--

• النسق العام:

انا مش عايز كل ده يتعمل زيه زي اي مبنى أصم خالي روح موجود في مصر.. لا انا عايز الملاذ ده يكون له معمار خاص ومميز.. الناس اللي كانت عايشة فيه ماتخجلش في يوم انهم كانوا جزء منه.. كل تفصيلة في الملاذ هتكون معمولة ومتصاغة بعناية عشان المكان ده يستمر ويفضل ملاذ لأي حد بعد كده...
انا مش بعيد مع الوقت تلاقوني راسم انا معمار المكان ده من كتر مانا بخطط له ونفسي احققه.

• كيف؟

المكان ده يعتبر مشروع حياتي وحاجة لسه فاكرها من اول مراهقتي..  فهفضل ان شاء الله اسعى له لحد مانفذه.
اظن اللي انا محتاجه هو راس مال ابني منه اول مرحلة مالمشروع ده.. تصريحات بناء عشان اكيد مش سهلة.. واظن تصريح اني اقدر ائوِ الناس في الملاذ، فأنا عارف ان السكة مش مفروشة ورد والله هو الفكرة كلها اني فعلا فضلت سنين طويلة افكر فالمشروع ده وافكر في انا ممكن اقدم من خلاله ايه.

بالنسبة لرأس المال: أنا الحقيقة مافكرتش لسه في الموضوع ده.. بس اللي انا عارفه ان كل اشكال الشراكة المادية اللي انا عاهدتها وشوفتها فشلت وأدت لفشل المشروع.. وأغلبها بتكون مشاريع ربحية.. فمابالك بمشروع خيري... ومع ذلك برده انا مش من مشجعي التبرعات لإن بشكل أو بآخر بحس فيها جانب من الجباية والتفضل على الطرف اللي بيتم التبرع ليه.. دي مش مستشفى الناس هتتعالج فيها وتمشي وكأن شيئًا لم يكن.. أنا عايز لما حد من أهل الملاذ يتعامل مع الحياة العامة براه مايتكسفش من المكان لان ده المكان اللي كنا بنجمعله تبرعات لا.. انا عايز اهل الملاذ يكون جزء منه وينتموا له عشان يخرجوا للمجتمع أسوياء نفسيًا وماعندهم مشاكل او خوف من اللحاق بالعار. (دايما بيذكر لفظ ابن المؤسسة وبنت الدار والملجأ) ده سبب ممن أسباب إطلاق مسمى ملاذ او مأوى عليه.. فممكن مع الوقت والدراسة والتعمق وعقد النية بشكل أسلم يعني يوضح لي طرق احسن لتوفير راس المال..
بعد ماربنا ييسرلنا كل ده ان شاء الله.. في اول المشروع هنبدأ بعدد نزلاء قليل.. عشان نجرب نفسنا احنا الاول.. الملاذ هيكون معتمد وظيفيًا على الموظفين بدخل ثابت هيكونوا كلهم من الشباب او اغلبهم.. يتوفرلهم قبل الشغل دورات تدريب كيفية التعامل مع النزلاء دول من غير تكلف ولا خوف ولا رهبة ولا اي حاجة.. ازاي تتعامل مع تحولهم اللي هما بيتحولوه مع الوقت..
عشان انا عايز احسن من حياة ناس مش اسوء عيشتهم .. لازم كل خطوة تكون مدروسة وكل حد بيتصرف تصرف يكون عارف هو بيعمل ايه.. والكلمة اللي تتقال بحساب.
وبخصوص التعليم ممكن يكون فيه مشروع مشترك مع أي جمعية خيرية ان المتطوعين يكونوا هما المسئولين عن مدرسة الاطفال ومحو الامية..

• نزلاء الملاذ:
• الأطفال:
  أول حق يخلق به الإنسان وهو طفل هو إنه يعيش طفولته، والطفل مكانه الحضانة والجناين والأماكن التاريخية والمحميات الطبيعية والمتاحف وحمامات السباحة وملاعب الكورة والسلة والاسكواش.
  اي طفل لازم يكون متوفرله انه يقدر يعمل ويوصل لاي حاجة ماللي فوق دي..
  الملاذ هيهتم انه يوفر للاطفال كل الحاجات دي فمبدأيًا زي كل النزلاء هيكون فيه أزياء مختلفة غير موحدة ليهم.. كل شخص يلبس اللي هو عايزه.. أتمنى ان كل اللبس اللي يجيلهم يكون جديد وهما اول حد يلبسوه وهسعى لده ان شاء الله.. بس حتى لو لا ففي البداية يكون لبس مستعمل من معارض الجمعيات الخيرية تجيلهم لحد عندهم وكل واحد منهم يختار اللي هو عايزه. حق الإختيار هيكون أهم أسس المعيشة فالملاذ إن كل واحد يختار هو يحب يلبس ايه وياكل ايه يتعلم ايه ويشتغل ايه.
  الملاذ هيوفر للاطفال الرعاية الصحية المناسبة ليهم ولسنهم ويكون فيه متابعة دورية لصحتهم ولتغيراتهم الجسمانية بشكل عام..
  من تاني الهدف من الملاذ هو التأهيل فضلًا عن الإيواء.. فالأطفال دي هيتنظملها رحلات تروح أماكن سياحية وتاريخية ودينية عشان يندمجوا مع وطنهم ومجتمعهم بشكل اكبر.. هيكون فيه فقرات ترفيهية جوه كل يوم ان الاطفال يدوروا او يقروا عن حاجة معينة او يكون فيه فيلم او قصة توسع مداركهم وعقلهم .. مع المراهقين يتم تقريبهم من التكنولوجيا بحرص عشان اي حد في سنهم لازم يكون قريب من التكنولوجيا بس فالاول وفالاخر تحت عين المشرفين.. (المشرفين لازم يكونوا من الشباب).
  مع المرحلة التانية هتكون المناطق الترفيهية والرياضية هتكون اتبنت ويكون فيه تدريب وتعليم للاطفال السباحة بشكل اساسي وباقي الالعاب باختيارهم.. الغرض الرئيسي من ملاذ هو التأهيل.

• الشباب والنساء
  الرعاية المعيشية والصحية رقم واحد.. بعد كده لازم ندرك بإن دول رجال ونساء مش أطفال.. الطفل سهل جدًا إنك تحسن وتقوم سلوكه، إنما لما يكونوا ناس تعاملوا مسبقًا مع المجتمع واحتكوا بيه واثر عليهم بالسلب بشكل كبير.. في حاجات كتيرة جدا وفيه خبرات كتييير جدااا الناس دي اكتسبتها مسبقا خلاص، فاحنا محتاجين جهد اكببببر بكتير عشان نقوم سلوك الافراد دي ونعيد تأهيلهم وتحسين قدرات التفكير المنطقي والتصرف السليم عندهم، تطوير مهاراتهم العقلية كلها.. تحفيز رغبتهم فالتعلم وفي التغيير عشان الجهد الكبير  ده يكون اقل شوية. (محتاجة تفكير ودراسة اعمق)
• الشيوخ
  الشيوخ هيتوفرلهم معيشة طيبة وصالات ترفيهية ورحلات ترفيهية.