آن الآوان ترحلي يا دولة العواجيز !!

آن الاوان ترحلى يادولة العواجيز!! احنا مش هنسمح ان يحكمنا حد  من كهنة معبد الاخوان و لا حد من كهلة الجبهة بغض النظر إن فيهم ناس بنحترمهم , اللى هيحكمنا هو جيكا اللى هيحكمنا هو كريستى اللى هيحكمنا هو احمد حرارة اللى هيحكمنا هما الشباب اللى نزلوا ميدان التحرير الشباب اللى لما نزلوا ضد مبارك ماكنوش بيدوروا على كرسي فى وزارة ولا فى مجلس الشعب احنا اللى هيحكمنا الشباب اللى ضحوا بأرواحهم عشان احنا نعيش أحنا هيحكمنا الشباب اللى فقدوا عيونهم علشان ينورولنا المستقبل احنا هيحكمنا الشباب اللى ماتوا برصاص الغدر فى بورسعيد احنا هيحكمنا الشباب اللى اتعرضوا للتخوين و العمالة و التكفير لمجرد انهم قالوا كلمة حق احنا هيحكمنا الشباب اللى ماهموش اسلحة الداخلية وقال انا سلاحى عقلى و لسانى احنا هيحكمنا الشباب اللى كانوا بيروحوا بالموتسيكلات مكان الضرب عشان ينقذوا المصابين احنا هيحكمنا دكتور اسمه علاءعبدالهادى كان كل امله ان بلده تبقى احسن من اوروبا و كان بيعالج الناس فى المستشفى الميدانى احنا هيحكمنا سالى زهران اللى ماخافتش من جابروت نظام ناس كتير خافت منه احنا هيحكمنا احمدبسيونى ارجل شباب مصر احنا هيحكمنا محمدالجندى الشاب الطاهر اللى قالوا عليه بلطجى اللى هيحكمنا واحد زى خالد على اللى مانجحش فى الانتخابات عشان ماعندوش مصادر تمويل كفاية لحملته الانتخابية ولا عمره تاجر بالدين ولا سرق فلوس المصريين و هو بيبنى المطار... لم يعد مكان فى هذه الدولة لذوى الشعر الابيض اتركوا اصحاب الشعر الاسود يتحكمون فى الملك حتى تروا كيف تدار الدول ...

و اى واحد هيقول احنا بنأمنلكم مستقبلكم اقولوا اتنيل انت ماعرفتش تأمن مستقبلك اللى هو الحاضر اللى احنا عايشين فيه , اتركونا نصنع مستقبلنا بأيدينا كى تتحسروا على عقودا ضاعت من عمركم فى النفاق و المحاباة ... تسقط دولة العواجيز ..