المخروبة

فيه ناس كتير من راغبي السيسي أو الإستقرار بمعنى أصح .. بيتهموا الشباب مثلا اللى عملوا الثورة أو اللى لسه ع العهد .. بعدم الإنتماء .. إنهم خلاص بقوا بيكرهوا البلد وماعدوش بينتموا ليها .. 

أمى مثلا , أكتر من مرة قالتلى إنى ماعنديش إنتماء للبلد .. أو إنى فى أى وقت ممكن أبيعها .. وكل مرة لازم أفهمها إن الإنتماء للبلد يعنى حبها .. وعلى رأى هشام الجخ إن الحب يعنى إتنين بيدوا ... مش إيد بتبني و 600 إيد يهدوا .. أنا شايف إن البلد حتى مش مديانا أبسط حقوقنا .. وإن إحنا ماعندناش كرامة .. و أصبح موضوع الكرامة ده عندنا بقى عقدة نقص .. و كتير شباب عايزين يبقوا فى جهة سيادية جيش ,شرطة, نيابة .. عشان يستعيدوا كرامتهم أو يحافظوا عليها ..  إحنا ممنوعين من إننا نحلم .. نحلم بإن كل واحد يكون اللى هو عايزه .. يحلم ببلده .. لإن لما الواحد يحلم ان المخروبة (المعنى اللغوي الدقيق لمصر) اللى احنا عايشين فيها دى تبقى زى المانيا او انجلترا او السويد او تركيا .. اسطوانة المواطنين الشرفاء بتتفتح وبنبقى عملا وخونة .. 

انا عمرى ماقلت قبل كده ان انا هسيب البلد دى و اسافر .. لان انا اول لما وعيت وعيت ع الثورة .. فكان عندى امل .. كنت دايما بقول ان ازاى الناس الكبيرة سكتت على مبارك السنين اللى فاتت دى وماثاروش .,. بس اكتشفت ان احنا عجزة بالوراثة .. ان انا كمان مش قادر  أعمل حاجة .. مش قادر اغير .. مش قادر اقول للسيسي انت ظالم ومنافق وكداب فى عينه .. مش قادر ارجع حق الناس اللى ماتت او حتى اخرج الناس اللى اتحبست ... بقيت مستنى لما السيسي يشملنا بحنانه ويخرجهم بقرار رئاسي .. 

احنا كلنا كده على بعض مجرد شخشيخة فى ايد المؤسسة العسكرية .. لإن ماينفعش ننتقدهم , نهاجمهم عشان الجيش .. المؤسسة العسكرية بتمتلكنا (حرفيًا) .. أنا مش عارف أدعى على مين ولا مين ... أدعى على اللى ظلموا و لا اللى اتظلموا وسكتوا .. ولا اللى كانوا بيتفرجوا ... البلد دى بقت مغارة كبير مليانة دهب وكنوز بس احنا كلنا واقفين بره عشان على بابا جوه .. 

إحنا شعب عالة .. همجى .. قليل الادب .. عقيم .. ونستحق اللى بيحصل فينا حرفيا .. لأننا مش بنيجي غير بالكرباج .. واتعودنا نعيش نمل جنب الحيط .. شعب جبان .. مش قادر يطالب بحقه وبيبرر الظلم .. شعب مايستحقش الحياة  ..

انا دايما بقول إن إحنا كمصريين عندنا مشكلة فى المصطلحات .. مش بنسمى الحاجات بإسمها ... اجت عليا فترة فى الدراسة كنت بسيب دقنى عادى مافيش وقت احلقها .. اهلى يقولولى احلقها احسن يتقبض عليك .. انا مسمى ده خوف هما بيقولوا عليه حذر .. بس انا شايف الحذر ده من حاجة ممنوعة .. مش من المباح ..

فمن مشاكل المصطلحات عندنا .. ان احنا مش عارفين يعنى ايه واجب .. يعنى السيسي يعزل مرسي .. ده انا شايفه واجب لا يُشكر عليه أصلا .. فيه ناس قالتله كمل جميلك ... فيه ناس بتشوف حرب الجيش و الشرطة ع الارهاب ده تفضلًا وتكرمًا .. أنا شايفه واجب ... فيه ناس بتشوف ان ظلم الداخلية ده عشان يحموا البلد .. انا شايفه انهم بيحموا نفسهم ..

اللى يخلي اى دولة متقدمة .. إن الناس تكون عارفة اللى بيحصل ده اسمه ايه ... يعنى يكونوا عارفين دى ثورة ولا انقلاب ... حكم مدنى ولا عسكري .. السيسي قاتل ولا وطنى .. لكن احنا مانعرفش غير انها ثورة واكيد طبعًا حكم مدنى وبالتالى السيسي ده شخصية وطنية فشخ .. 

بدون أى مزايدات .. احنا كلنا عايشين في باسكت زبالة كبير .. كبير أوى .. قذر و ريحته وحشة وكلنا ملزقين فيه .. وانا شايف ان احنا عالم (اوساخ) واحنا مش احسن من حد .. بالعكس اى حد (بيفكر) ولو فى موزبيق هيكون احسن مننا .. ولا مليون قناة سويس جديدة هتنضفنا .. مادام عوائدها بتتسرق .. ولا عمرنا هنتقدم .. طول مالحكومة بتنضف الشوارع و تزوقها عشان الزيارات الرسمية .. وبعد كده بيش*وا فيها عادي ..

ادعولى ان انا امشي .. اسافر اى حتة محترمة .. اى حتة .. اينعم مفيش حاجة بتغنى عن (الوطن) بس مادام مش ملكى و مليش حق فيه يبقى انا ادور على حقي في اى حتة تانية .. على الاقل هتعامل كإنسان ..