شقيق الروح

٣ـ

كنت قبل كده قبل ثانوية عامة وخاصة في إعدادي واولى ثانوي ماكانش ليه ذوق مميز في اي حاجة غالبا .. ماكانش ليا شخصية مميزة وتصرفات مستقلة وما إلى ذلك .. ماعدا في السياسة يعني او الثورة بوجه عام لاني كنت مع الثورة من ساعة ماطلعت ويعتبر هي اللي فتَّحت عينيا .. في بداية تانية ثانوي قلت انا لازم ابعد عن صحابي شوية او جزئيًا عشان اتعود اني اذاكر ومانساقش اني اخرج كل يوم وعادي اني ماحضرش درس .. او لو فيه درس الساعة ٨ انزله مالساعة ٥ واضيع وقت .. وعملت كدا فعلا .. ولما عملت كده .. ان مش اي حاجة الشلة تكون عايزة تعملها اقوم انا اوافق عليها واعملها وانا ماليش رغبة ليها .. ماعدتش بتأثر فيا فكرة ان اصحابي بيكونوا بيعملوا حاجة وانا مش بعملها معاهم .. او اني لوحدي او هكذا يعني .. و من ساعة ماعملت كده .. بدأت اكتشف نفسي نوعًا ما .. بدأ يظهرلي ذوق معين فالمزيكا اللي بسمعها .. هدف عايز اوصله وبوضوح .. بقيت بهتم اني يكون عندي رغبة في الحاجات اللي انا بعملها.. مش علي حسب الشلة عايزه ايه .. بدات ادرب نفسي اني اذاكر حبة حبه .. وفي ثانوي طبقت نفس الخطة بسكل موسع .. اني بنزل فالوقت اللي انا فاضي فيه مش اللي هيتنزل فيه .. ماعدتش بتغريني اسباب النزول التقليدية اللي كنت بضيع عليها وقت قبل كده ..

و وانا في غمار الدراسة ظهر شخص اتكلمت انا وهو كتير لحد ماعرفت ان دماغنا شبه بعض ،، بنفهم الكلام اللي بنقوله مش بنتريق على بعض وخلاص .. لينا نفس الذوق والرؤية والأرادة بوجه عام .. عملنا حاجات كتيرة جدا هونت علينا السنة .. ولما جيت اكتوبر الجامعة كان هو برده كليته في اكتوبر .. وهون الغربة عليا كتير جدا .. بالنزول والخروجات ومرواح الحسين ونص البلد والتحرير .. واحد من الاتنين او التلاتة اللي كنت اقدر احكي معاهم من غير تفكير ومن غير حسابات .. بعرف احكي معاه عن تفكيري .. وعن البنت اللي عجبتني في ثانوي .. الوحيد اللي حكتله اصلا ..

لكن للاسف نقل سكنه من اكتوبر .. فماعدش فيه نزول وقت الخنقة فجأة .. مافيش مشي عند الحصري في الوقت اللي تهب في دماغنا فيه .. اينعم ليا صحاب في الكلية .. بس بالنسبة لي هما صحاب الهلس و اللعب والهزار .. فيهم كذا واحد جدع بجد ومش بيتأخر عليا لو طلبته ومنهم اللي مش بعتبره حاجة اكتر من زميلي وخلاص والوقت بيتقضى .. بس مافيش حد منهم كنت اقدر اتكلم معاه او احكى .. الفضفضة ماكانتش بتطلع .. لو عندي افكار بعملها او عايز اعملها مش هقولهالهم لاني عارف مصيرها مش هيكون اكتر من التريقة والكلام السلبي ..

وبرغم اني مش بتفق فكريا ولا بتقابل مع اي حد في الكلية تقريبا ،، وبحس ان فيه بين دماغنا "مصانع الحداد" .. إلا إن ربنا رزقني بشخص مايختلفش عن صديق ثانوي في حاجة .. لينا نفس الاهتمامات والدماغ والتفكير ..

انا زي ماعندي اهتمام وتطلع اني اختار البنت اللي اكمل معاها بقيت حياتي .. عندي اهتمام جدا برده ان يكون عندي الصديق اللي لما احتاجه الاقيه .. ويوم مانقول يانزول يبقى اليوم مميز فعلا .. مش وقت بيتقضى وخلاص ومالوش طعم اصلا ..

انا كنت غالبا في الفترة الاخيرة هكتئب من الوحدة الغير مبررة بما ان حواليا ناس كتير وكده .. بس ربك اللي بيكرم .