إصحى يناير !

من غير ديباجة عشان منزوقش في الكلام , وكمان مش بالفصحى علشان كل اللى يقر ا يفهم , عايزك تتخيل دلوقتى وانت قاعد وسط ولادك وعيالك مقفول عليكم بيتكم ومدفيين تحت البطانيات وقاعديــن قدام التلفزيون و اللاب و حواليكم كل وسائل الراحة , وقاعدين ع الفيس بوك ولا تويتر وماسكين فى خناق الإخوان على إن 30 يونيو ثورة ولا إنقلاب .. مرسي الرئيسي ولا مفي غير السيسي ..

وشوف بقى الناس اللى مالهاش مكان تأويها و مالهاش لمة تدفيها , ماعندهمش غير الرصيف و الهدوم اللى عليهم , تفتكر بيفكروا فى مرسي ؟ طب بيفكروا فى سي السيسي ؟ بيفكروا هى ثورة و لا انقلاب ؟ شاغلين دماغهم بنعم ولا لأ ع الدستور ؟ ..

الشباب لما نزل يوم 25 يناير ضد إمبراطورية مبارك وداخليته ماكنوش هدفهم الشهرة أو السلطة و الفلوس , نزلوا يطالبوا بأربع حاجات مفيش غيرهم " أكل , حرية رأى , عدل , كرامة " أو عيش حرية عدالة اجتماعية كرامة إنسانية, وماكانش هدفهم انهم يشيلوا مبارك بدليل انه اول لما مشى كانت فى مظاهرات موجودة ع الأرض , فى 25 يناير لما الشعب كسر حاجز الخوف عند الناس كلها , ماكانوش بيفكروا مين اللى هيحكم بكره , كان كل حلمهم إن الراجل اللى خلاهم فى سابع ارض يمشي ..

النهاردة ع الفيس بوك ولا على تويتر لما بشوف الكلام بتاع الفلول و عبيد السيسي و كلاب الإخوان عن 25 يناير , واحد يقول عليها نكسة و واحد يقول عليها ثورتنا .. مش ده المهم 25 يناير عمرها ماهتكون ثورة كاملة غير لما مطالبها تتحقق على أرض الواقع , وهى مش مطالب إباحية لاسمح الله , لأ دول ناس بينادوا بكرامة كل مواطن مصري ,وعمر ما 30 يونيو هيكون ثورة كاملة غير لما مطالبه اللى هي نفس مطالب يناير بالظبط تتغيّر , لكن لو كان كل هم الناس اللى نزلت معانا فى يونيو إنهم يشيلوا الإخوان بس , فيقى هو كده فعلًأ إنقلاب ..

الثورة مابتصنعهاش الأغلبية و لا تصدق على قرار صناعتها أى نظام , الثورة بتخرج من الشعب اللى مابينحنيش و اللى مابيطبلش , من الشعب اللى بيفضل ثابت على مبادئه و مطالبه , الشعب اللى مطبلش لمرسي لما حكم ولا الشعب اللى بيتمنى يبوس تراب رجلين السيسي , إنتوا اللى بتكرهوا الناس فى الناس الوطنية , وتطبيلكم ليه بيسوء سمعته و نزاهته مش بيوسعها ,,

لو 25 يناير هى اللى شبابها عمره ماطبل لحاكم لما بيكون غلطان , ولو كانت هى اللى بترفض عودة نظام مبارك أو مرسي , ولو هى اللى ضد بلطجة الداخلية , و لو هى اللى بتطالب بالحرية و العدالة الإحتماعية و العيش و الكرامة للمواطنين .. ولو هى اللى شبابها لغاية دلوقتى متمسك بمبادؤه ومطالبه و مابينحازش الا للمظلوم , فتبقى ثورة 25 يناير وثوارها يمثلونى !

ومش الاخوان هما اللى يتاجروا بـ25 يناير , لإن الاخوان أجبن بكتير إنهم كانوا يخاطروا مخاطر زى دى !

ولكن فى النهاية مادامت مطالب يناير لم تنفذ , فبكدة , طنطاوى =مرسي =السيسي = مبارك .

مُصطفى عادل

13-12-2013