قصيدة "معارف"

أنا عارف .. إن ضياء الشمس أقوى بكتير من القمر ..

أنا عارف .. إن ميّة السما مش غيث بل إسمها مطر ..

أنا عارف .. بإن الجفن لو غفّل الحقوق هتروح هدر ..

أنا عارف .. إن الصبح جي , بس الصبر مات ..

وعارف إن للقيامة علامات ..

وعارف إن الحق بيكسب في النهاية بس في الأفلام ..

وعارف إن دمى الحر حلال ع الطاغي والحكام ..

وإن الثورة لسة برده فيها كلام ..

أنا الجامع علوم الحق , أنا حافظ معالم الكون ..

أنا المعروف بقولة لأ , وبخلع كل يوم فرعون..

أنا المعروف بأحلامى وبالنسبة لكم أوهام ..

أنا اللى فيّا شبه منكم بسيطي وسطوي ع الأيام ..

بس إنتوا عشان تقربوا الكرسي لكوا قدام ..

وأنا عشان أبعدكوا ..

إنتوا تقولوا بس كلام .. وأنا أحارب ألاعيبكم ..

أنا العرَق اللي بيكافح .. انا الجندى واقف صاحي..

أنا الممكن أعوز الموت , عشان يامصر ترتاحي !

مصطفى عادل

23-12-2013