كانت هتفرق في الوداع

الإسبوع اللي فات كنت في بورسعيد حضرت حفلة لمسار إجباري هناك .. بالرغم من إن الحفلة كانت بالمجمل حلوة والصحبة لذيذة .. وناسيين ورانا الدنيا وماكناش بنفكر في حاجة .. بس هاني غنى اغنية كان اول مره اسمعها للباند .. اللي هي كانت هتفرق في الوداع .. الاغنية دي انا كنت سمعتها قبل كده من احمد مكي بس ماحسيتهاش زي ماحسيتها يومها .. الاغنية دي او القصيدة دي صعبة فعلا .. مؤلمة اوي .. قالت كلام نحس بيه عى مدار حياتنا .. بس مابنعرفش نعبر عن احساسنا بيه .. بس فعلا لما سمعتها حسيت بحاجات كتير اوي راحت مني في حياتي من غير ماشبع منها .. وان فيه ناس كتير اتقطعت علاقتنا وماعادش فيه اتصال مابينا من غير ما اقولهم انا كنت بحبهم قد ايه .. 

افتكرت و انا في ابتدائي .. كان فهي بنت معانا في الفصل انا كنت فعلا بحبها .. بس مفيش حاجة اسمها كده وقتها .. وكنت فاكر اني بقعد اسرح معاها ساعات .. بس ماكنتش بعرف اكلمها .. وفجأه في سنة من السنين اتلاقيتها مشيت من غير ماقولها اني كنت فعلا مستلطفها وكان نفسي نفضل صحاب ونسال على بعض ..

وكان في نفس الفترة تقريبًا كنت بروح دار تحفيظ قرءان .. وكان اللي بيحفظونا تلاتة بنات واحدة كانت عنيفة ماكنتش بحبها لدرجة اني مش فاكر اسمها .. ، اتنين فعلا حبيتهم من كل قلبي -وربنا يمسيهم جميعا بالخير- كنت فعلا بحبهم .. ماكنتش بحب آكل التين الشوكي .. مش فاكر ليه .. بس في مرة كنت رايح بدري و ابلة امينة اديتني خمسة جنية وقالت لي هات تين واطلع .. روحت جبت تين على اساس انه ليها .. اكلتني معاه او بمعنى اصح ارغمتني اني آكل معاها .. وبقى اكتر ممكن فاكهة بحبها .. وانا متأكد انها لو عرفت باقي انواع الاكل اللي مش بحبه كانت هتحببهولي .. ودلوقتي كل اما اكل تين شوكي افتكرها وادعيلها .. بس في مرة في رمضان في احد السنين .. روحت عمرة .. وقلت لامي تجيبلهم هدايا اديهالهم هيفرحوا بيها .. وجبت بالفعل .. ولما رجعت بورسعيد تاني .. صحابي قالوا لي ان الدار اتقفل .. وماعدش فيه تحفيظ .. من غير ماودعهم .. او اعرف عنهم اي حاجة ينفع تربطني تاني بيهم .. من غير ماقول لهم انا كنت بحبهم اد ايه .. وازاي هما كانوا مسهلين عليا حفظ القرءان ومحببني فيه ....

فيه مدرسين كتير في الثانوي .. كنت فعلا بحبهم .. ومش عارف ليه ماروحتش سلمت عليهم بعد كده .. واللي روحت يلت عليه لسه فعلا واحشني .. بس ماعدش فيه فرصة اني اقعد قدامهم تاني ... استمتع بكلامهم وهما بيشرحوا .. يعني حقيقي طوبى لمن حببني فيما كنت زمانًا اكرهه .. الناس دي من حبي فيها بقيت بستمتع بالمنهج التقيل اللي الرخم اللي بيقولوه .. كنت بحب اروح عشان استمتع بس .. عشان اسمع استاذ العربي وهو بيتفنن في حكاية القصة العقيمة اللي عندنا .. كنت بحب درس البيولوجي ده اكتر من اي حاجة عن كمية المعلومات الزيادة اللي كان المستر بيديهالنا من غير مانطلب .. كنا بنشوف فيه مثال نفسنا نبقى زيه في علمه وثقافته .. استاذة الجيولوجيا .. اللي رغم عنفها و عضها كنت فعلا بحبها في الله .. كل الناس دي مشيت من عندهم من غير ماهم يعرفوا انا كنت بحبهم وبحترمهم قد ايه .. ومش عارف فيه فرصة تانية اقابلهم اقولهم كده ولا لا ..

كلمات الاغنية دي لمست جرح كبير اوي بعاني منه .. اني مش بشبع من الحاجة قبل ماودعها .. ان مش بعرف الناس انا حبيتهم قد ايه .. قبل ما مايكونش فيه فرصة تانية اني اقولهم .. بس فيه حالات بتكون خارج عن ارادتي .. ان حتى لو رجع بيا الزمان مش عارف كنت هقولهم ولا لا ! ..

بس في المجمل ان ماينفعش حاجة تانية تضيع مني او تسيبني غير لما اكون شبعان منها .. معرفها قد ايه اني كنت بحبها وبحترمها .. هدور على نسخ لعب كنت لعبتها زمان وماعدتش عندي .. عشان لما احن لها ابقى العبها .. هحاول اني ماخسرش حد .. ولو ربنا قدر وخسرت خد بحبه لازم اكون معرفه قد ايه انا كنت بحبه ... وان قلبي يكاد يفطر بعد فقدانهم ..

ربنا مايحرمناش من حد بنحبه .. آمين ! 🙏🏻🙏🏻

https://soundcloud.com/massaregbariofficial/zrqiq9a8ciyf