وطن السيسي

مصر حاليا بقت نموذج مثالي متناسق بكل ما تحويه الكلمة من معنى ، السيسي رئيس .. مفيش مؤسسات لغينا الدولة العميقة ونعتمد كليًآ على مؤسسة واحدة وهي الجيش .. البرلمان يضم مجموعة من المتخلفين عقليًا ونصابين وأفاقين و ممثلين عن الشعب -بدغم انه ماختارهم- بس فعلا في كل واحد في البرلمان شايف نوع من انواع المصريين و ممكن يكونوا هما كلهم مجتمعين في كل فرد مصري .. مابين الفهلوة و الاونطة و الكذب و التطبيل و النفاق و البلطجة .. الداخلية اسياد الشعب و ممارستها تليق كليًا مع الهيكل الظاهر و الباطن للنظام الحاكم .. 

مفيش حاجة بتحصل في الدرى .. مفيش تعاملات من تحت الترابيزة .. بل بالعكس الترابيزة مقلوبة و اللعب كله ع المكشوف.. مافيش حد بينكر حاجة .. اللي تآمر اعترف و اللي عذب اعترف و اللى اخد رشاوي اعترف و اللي افسد الحياة السياسية و الذوق العام معترف .. و العدالة غياب .. دلوقت بقى النصيحة السائدة في النقاشات السياسية اذا كانت بين افراد الاسرة او ع الهوا في التلفزيون هو ماتتكلمش احسن يقبضوا عليك .. 

اصبح ظاهر جدا ان انت لو معارض محتاج انك تعمل تصريح تظاهر عشان تتظاهر و مش من حقك تتواجد في اي ميدان معترضا الا هيتقبض عليك و يا عالم اهلك هيشوفوك تاني ولا لا .. في حين انك لو واحد من الاهالي الشرفاء او العبط بتوع البيه ميدان التحرير هيتفتحلك لحد لما تخلص رقص و تروح بسلام وأمان ..

حقيقي انا مش شايف اي خلل في النظام السيسي هيكليًا .. يعني مش متوقع ان واحد في حجم السيسي يستحق ان دولته يكون عندها برلمان الا بالحجم ده .. و ان تكون مؤسساتها بالحجم ده .. و ان تكون قراراتها المصيرية بالحجم ده .. و يكون الدم المصري بالتمن ده .. و الكرامة .. هههه قال كرامة قال ..

يعني السيسي مش مقصر في حاجة لغاية دلوقتي والله ،،، ده لو يطول يخلي مصر سجن كبير ليه قضبان و زنازين جنب بعض كل زنزانة فدان لكل مواطن .. عشان نموت مالخلا .. مش هيتأخر .. لو يقدر يقطع لسان الشباب كلهم  يرميهم ورا الشمس هيعمل .. و هيلاقي اللي يأيده و يطبل على قراراته .. لانها اكيد في مصلحة الوطن وان هو المنقذ اللي مش بس يمشي على سجادة حمرا بعربيته دا احنا نفرشله اجسامنا يمشي عليها .. وكل الكلام الجميل ده ..

انا مش عارف اقول الثورة جاية جاية ولا لا ! .. بس احمد فؤاد نجم -الله يرحمه- قال :

اسمعي يابلدنا خلاصة القول

راح اقولك اهو وانا قد القول

مش ممكن كده هيحول الحول

على كده و الناس يفضلوا ساكتين 

https://soundcloud.com/thebiggboy/revolution-records-ft-sheikh اذا الشمس غرقت - الشيخ امام ،revolution records