التدوينة السنوية : ٢٠١٦ في مهب الريح..

٥-

البلوج السنوية .. الحقيقة انا مش عارف السنة جت في إيه ومشت في إيه .. أنا بلوج ٢٠١٥ لسه فاكر كل حرف كاتبه فيها وممكن اسمعها غيابي كمان .. السنة أحداثها مش كتيرة وحصلت برتم بطئ لكن السنة على بعضها عدت بسرعة .. زيها زي اي سنة فاتت او لسه جاية .. هتفضل تعدي بسرعة من غير مانحس بيها إلا لو إحنا حققنا فيها حاجة فعلا .. أيام بتفوت من حياتنا وبس .. مقياسها فعلا إنجازاتك ، أنا مؤمن جدًا بإن العمر مابيتقاسش بالوقت ، لا بالإنجازات .. الحاجات اللي انت كنت مخطط تعملها في اول السنة وخلصت السنة ولاقيت نفسك محقق جزء كبير منها .. ده اللي بيضفي القيمة للوقت والعمر اللي بيعدي منك يوم ورا التاني ..

أنا السنة دي كنت حاطط سلوجان ليها زي ما سات الريس بيحط إسم للسنة (عام الشباب وعام المرأة وكده) .. والسلوجان ده كان حلو فشخ وانا مؤمن بيه جدًا .. تعلم يافتى فالعمر لك .. في بداية السنة كنت قرأت عن كذا نموذج خلوا شغلهم الشاغل في الحياة هو التعليم .. تابعت كذا شخص عالسوشيال ميديا وكنت منبهر بتنوع ثقافتهم و وسع مداركهم .. وانه لما ببيجي يتناقش في حاجة بيكون معاه الحجة والمادة العلمية اللي يتكلم بيها .. فكان اول قرار ليا السنة دي إنيث أقرا ٥٠ كتاب ..  قرأت منهم ٣٥ .. بس ده في حد ذاته إنجاز .. في نص السنة (الأجازة) كان فيه متسع من الوقت .. قسمت الخطة وهعمل ايه كل يوم .. ايه الحاجات اللي فعلا عايز اقرا فيها .. عايز اتعلمها .. ايه الحاجات اللي لما اقرا فيها هتزود معلوماتي او هتفيدني .. انا عايز اتعلم ايه ؟ .. فذاكرت فرنساوي واتعلمت شوية تركي بس ماكملتش .. بشوف دروس فقه عاليوتيوب لشيخ اسمه سعيد الكملي (مغربي وموسوعة علمية قاعدة على كرسي كل اما يشرح حديث قادر إنه يجيب تاريخ الراوي والمسند إليهم الحديث كلهم ويتكلم عنهم ولو قالوا شعر يقوله ولو اتقال فيهم شعر يقوله فماشاء الله يعني واستفدت منه كتير جدا جدا ولو حد مهتم هتستمعوا جدا وانتوا بتشوفوه) .. اتعلمت مبادئ الكودينج وإن شاء الله ناوي أكمل فيه واتعلمه .. حاولت احفظ قرءان بس للاسف ماكملتش بس بذرة النية لسه موجودة ومستعدة للري في اقرب فرصة ان شاء الله .. وأنا اصلا من الناس اللي بتحب التاريخ .. فقرأت في التاريخ ..بس لسه محتاج اتعمق اكتر واقرا اكتر ..بحاول بقدر إمكاني إني أتعلم كذا لغة بحسن نفسي في الانجليزي و بتعلم فرنساوي وألماني فدي حاجة انا معتز وفخور بيها جدا .. كنت السنين اللي فاتت بقرأ روايات بشكل كبير وكانت بتمثل كل قراءتي غالبا بس قللت منها وبدلتها بكتب احسن ..

اتأكدت من المقولة اللي بتقول ، كلما إزددت علمًا كلما إزددت جهلًا ، وفي صيغة تانية: كلما قرأت أكثر كلما إكتشفت إنك أكثر جهلًا .. وده حقيقي جدا .. انا فيه حاجات كتيرة جدا ماكنتش اعرفها قبل السنة دي وعرفتها .. كان فيه اسماء صحابة ومقربين للنبي عليه الصلاة والسلام وانا حتى ماعرفش اسمهم ولا اعرف عنهم اي حاجة .. ماكنتش اعرف حاجة عن الثورة الامريكية ولا الحرب الاهلية هناك .. ماكنتش اعرف حاجة عن الكساد العظيم .. فكان كل لما عيني تقع على حدث او كلمة انا ماعرفش معناها او حصل فيها ايه .. دايما ادور عليها واجيبها .. انا حاليا بدأت أحس بنوع من أنوا النرجسية وأنا بكتب ، بس فعلا أنا مبسوط بالإنجاز البسيط إللي انا عملته السنة دي .. بحس إني بكفر وقت كبير ضاع مني قبل كده في كلام فارغ وخروجات وهلس وانا فاكر اني دماغي نضيفة وعندي معلومات .. لكن مع الوقت وكل لما بقرا حاجة بكتشف اني ازاي كنت عايش من غير ماعرف المعلومة دي ..

كان من الحاجات اللي نفسي أحققها بقالي فترة كبيرة وعرفت اعملها السنة دي .. هو اني اشتغل في العمل التطوعي .. اينعم مادخلتش فيه بقلب جامد بسبب الدراسة والالتزامات الكتيرة في الجامعة وكده .. بس اشتغلت في العمل التطوعي لاول مرة في حياتي وكانت تجربة وخبرة لذيذة جدا .. وبدعوا اللي يقرا البلوج ديه انه لا يتردد وان حتى لو ماغذتلكش روحك بشوية حب وتفاؤل .. هتكون حاجة حلوة تكتبها في الCV .. 

الحدث الأعظم بقى .. أنا بحب الكتابة جدا والله .. وبحاول أطور من نفسي فيها على قد ماقدر .. وبحب اللغة العربية عامة وبحب اكتب بيها .. فبدأت أكتر من الكتابة واكتب قصص قصيرة أو مايقال عليها قصة قصيرة .. وإتضح إنها كانت حلوة حيث إني إكتسبت بسببها تاني سول ميت ليا وأقرب أصدقائي وناس تانية جميلة جدا برده يعني فأنا مبسوط بالموضوع ده جدا .. وفي أواخر السنة دي عقدت النية إني أبدأ في مشروع أول رواية أكتبها وبدأت فيها بس لسه محتاج أقرا شوية حلوين علي ماكملها .. فالله المعين ..

السنة تبدو نوعا ما سعيدة أو مشت بشكل إيجابي الحمدلله .. بس حقيقي تخللها ألم كتير جدًا وقلق ومخاوف .. خسران ناس و تغير وجهة نظري عامة تجاه ناس تانية .. إحساس كان بيجيلي أوقات في بداية السنة إني وحيد إن مش حوليا ناس .. أنا ايه اللي جابني هنا انا عايز ارجع بورسعيد .. ماكنتش بستريح مع صحابي هنا .. كنت بحس ان فيه حاجة غلط في العلاقة بينا .. حاسس إني مش متعود عليهم .. مش فاهمهم ومش فاهمني .. اسلوب التعامل مع بعض منهم كان بيضايقني وبفضل مضايق منه لاوقات كتير .. بس بطريقة ما بدأت أحسن العلاقة .. أو بمعني أصح بدأت أحدد لنفسي أنا لازم أتعامل مع كل واحد ازاي .. إكتشفت إن الإنسان بيقدر يسيطر على أفكاره وإنه يقدر إنه "لا يعطي أى خراء" للي الناس بتعمله وتصرفاتهم .. فبدأت أحسن من علاقتي بيهم ،، وأحوال أتعامل مع ناس تانية اكتر يمكن ألاقي فيهم شمسي (التبريزي) .. وفعلا عرفت ناس كتير أول السنة منهم واحدة من أقرب أصدقائي (وكان بسبب المدونة دي برده)بالرغم إننا ماعدناش بنتكلم كتير  .. وصديقي المقرب اللي لسه جايب سيرته .. والاشخاص الجدعة اللي معايا دايما .. فانا ماقدرش اقول عليها سنة وحشة ، لانها حلوة .. وماقدرش اقول عليها سنة حلوة لإن ماحصلش فيها الإنجاز الحقيقي اللي يديلها قيمة وتخليني افتكرها بعدين زي السنة اللي فاتت .. 

من المبادئ اللي كنت بهتم جدا اني اطبقها ونوعًا ماخليت بيها ومامعملتش بيها السنة دي هي : السعادة ستأتيك عندما تتوقف عن مقارنة نفسك بالآخرين .. المبدأ ده مش تنمية بشرية .. لا ده واقع ومجرب جدا بالنسبة لي .. الوقت اللي بحط نفسي فيه موقع مقارنة مع اي حد .. بيكون أتعس وقت بالنسبة لي بيملاها التفكير الكتير والاحقاد اللي مالهاش لازمة و بلا ازرق .. فنصيحة ماتقارنوش نفسكوا بحد .. انتوا واللي انتوا بتعملوه لنفسكم بس مش لحد تاني..

السنة بمنتهى البساطة بدأت بوجع وقلق وتفكير ومعرفة ناس جديدة ومحاولة لإيجاد هدف للحياة .. ودراسة ومعرفة ناس جديدة وفقدان الناس اللي قبلهم ،مشاكل وشغل عيال ووجع دماغ ودراسة وطب وفيسيولوجي كتير .. و وقت بقى يضيع وانا راضي عنه وإني حاسس إنه ماضاعش في الهوا ... أو إني مش بعمل حاجة في حياتي ولا بقدم حاجة لحد .. 

وفي النهاية ربنا يديم عليا نعمه .. ويخفف عني محنه .. ولا يكلف نفسي أكثر من وسعها .. آمين ..

ودمتم ✋🏻😇