مشكلة

أنا طالب ثانوى فى مدرسة أشبه بالمجمع فيها إعدادى و ثانوى , طبعا أعرف ناس كتير زمايلاى و اصحابى و مدرسين و كله ,

بس ماكانش كل المدرسة صحاب فى بعض لأ , ده كل تلاتة اربعة عاملين شلة و مابيقعدوش غير مع بعض مابيتكلموش غير مع بعض , فلما كنت اشوف واحد معايا فى نفس الفصل كنت عارفه بس ماكنتش اعرف بيفكر ازاى ايه ميوله الفكرية و كده , فماكنتش اقدر اوصل لاى واحد منهم لأنى ماعرفش طريقة تفكيرهم كل ده و انا فى ابتدائى و اول اعدادى لكن لما بدأ عقلنا ينضج كل واحد بقى بيتكلم فى اى حاجة من غير خجل بقى فيه مواضيع جديدة بتتفتح ماتخيلتش مرة انى اسمعها او افكر فيها بغض النظر عن كل ده ;) 

بدأنا نتعرض لمواقف نشيل فيها مسئولية حتى لو مواقف تافهة أو مش هى دى المسؤلية اساسا بس بقي اغلبنا بيتكلم بجد و بيفكر بعقله , و بقى فيه واحد يفكر انه يرتبط بواحدة و تانى راسم على جواز و تانى بيتسلى مع كل واحدة شوية , بس لو لاحظنا الفرق قبل و بعد النضج بقى فيه تغيير جذرى بالنسبة للولاد فأصبح الاتجاه كله نحية الارتباط او الجواز او البنات بشكل عام .

طبعا معظم الولاد بيعملوا ده بصفو نية و حب و بالابالابالابالا لكن فى الحقيقة معظمهم مابيكونوش قد المسئولية او مع اقرب مشكلة بيفكرشوا و يعنى هما خلاص ارتبطوا هو داخل فى دور سي السيد بالتالى هى هتقلب فجأة لعضوة فى جمعية حقوق المرأة مع انهم الاتنين غلط , و مع ذلك فيه واحد من الشلة يعمل دور المصلح الاجتماعى فيصلشح مابينهم .. مايعرفوش ان كلها كام و هيزهقوا دى هتزهق من الخنقة و ده هيزهق من مشاكلها و انها مش بتسمع كلامه , و الاتنين هيخشوا كليات مختلفة هيتعرفوا على ناس اكتر بشكل اوسع ساعتها ده هيشيل المسئولية بجد و دى هتاسس نفسها عشان تكون ست بيت , لكن هما واخدين الموضوع بدرى قال يعنى تيمور و شفيقة .. فدايما مانتسرعش عشان اللى جاى مختلف و احسن.